Neste sentido, cando se entenda que unha determinada investigación e/ou actividade pode ser de interese para estes obxectivos, deberá remitirse ao director da cátedra un documento descritivo da proposta que, como mínimo, conterá os seguintes apartados. :

• Antecedentes e descrición do contexto de traballo.
• Descrición técnica da proposta (pode haber anexos se é moi extensa ou técnica, quedando a memoria para unha breve descrición).
• Fitos e entregas (sexan documentos ou outro tipo de accións)
• Orzamento (o máis detallado, pero sempre diferenciador: persoal/compras/servizos).
• Equipo técnico e investigador principal responsable (sempre profesor titular da UDC).

O director da Cátedra, en función do contido e da temática da proposta, remitiralla ao coordinador da liña de investigación para a súa avaliación. Este poderá interactuar coa proposta co obxectivo de procurar a máxima adaptación ás iniciativas en marcha no seu interior, para que poidamos desenvolver sinerxías entre os distintos proxectos. No entanto, en ningún caso se limitará a proposta se non existe nese intre algo similar ao que se presenta na liña de traballo.

Despois desta interacción, se a proposta é validada polo coordinador e polo promotor, levarase para o seu debate ao Comité Científico-Técnico para o seu coñecemento. Esta comisión valorará a posibilidade de incluír calquera aspecto científico ou tecnicamente relevante antes de que o director da Cátedra conceda o financiamento.

Este financiamento tramitarase mediante contrato Art.83 da LOU a través da FUAC, no caso de colectivos ou investigadores da UDC, con convenios de colaboración ou contratos comerciais no caso de persoas físicas.

As propostas dirixiranse a secretaria@catedraemalcsa.es e poderanse realizar en calquera época do ano.

As condicións de seguimento dos proxectos explícanse no manual do proxecto.